Wel bin ik en wat schrief ik?

Ik bin in april 1959 geboren in Nörg, in de kop van Drenthe. Oons gezin bestun oet pap en mam en dree wichter. Wij woonden in bij opa en oma en hadden een klompenmaokerij, een winkel in tabak en een scheersalon/kapsalon.
As klein kind much ik altied al geern lezen en dat is nooit veraanderd. Ik bin gek op verhaolen!
Toen ik in Assen naor de HAVO gung, wör mij deur mien leraor Nederlaands zèegd dat ik toch veural deur mus gaon met schrieven. Hij gaf mij prachtige ciefers veur al mien schriefopdraachten. Dat dee ik tot ik van school gung. Daorna heb ik jaoren niet schreven. Ik har 't veul te drok met waark, kinder en körfbal.

In 2013 bin ik weer begund met schrieven. Eerst nog allén in 't Nederlaands, maor naodat ik metdaon har an Dwingelart, een open podium in Dwingeloo, aal vaoker ok in 't Drèents. Ik dee de Drèentse spellingscursus en laoter ok de Drenthe cursus over oonze taol en cultuur. Ik wör lid van de schriefclub Schriefwaark van Het Huus van de Taol, waor wij aal weer wat neis leert en de meest moeilijke, vrömde, mooie opdraachten metkriegt naor hoes.

In meert 2017 was der een Lös Huus bij Het Huus van de Taol. Daor dee ik met an Loketpoëzie. Ik zat aachter een loket en mèensen konden bij mij kommen en één op één naor een gedicht van mij luustern. Spannend, maor dat was mooi um te doon!

Vanaof die tied schrief ik aal meer, in 't Drèents en Nederlaands. Zo heb ik al twee bundelies oetgeven; 'Leven is leefde' en 'Mien kiek op de wereld'.
As mien kleinkinder veer jaor wordt, kriegt ze een eigen bookie waar ik de tekst veur schrief en de oma/opa van d'aander kaant de plaoties derbij bedèenkt. Dree bint klaor, één is nog onderweg; 'Frederik en Annechien' over twee schildpadden, 'Simon Slak is jarig' over slakken, 'Rien en Rex' over dino's en veur oonze kleindochter, die in jannewaori veer wordt, moet 't verhaol gaon over eenhoorns. De titel is nog niet bekèend.
We hebt van alle kinderbookies vieftig laoten drukken en geeft de opbrengst van de verkoop an KiKa. Het idee: wij hebt veer gezonde kleinkinder. Dat gun we aander opa's en oma's ok!

Dan schrief ik ok nog regelmaotig een column veur de Nörger Courant, De Krant een een stukkie Drèents in De Boerhoorn, het blad van oonze Historische Vereniging. En zo aof en to wordt der een verhaol of een gedichie van mij in de Zinnig plaotst.